早兩日，加拿大移民部（IRCC）終於宣布咗Express Entry（EE）嘅改革。對我自己嚟講，算係一個long wait and it finally came. 雖不完美但可改善。

可能對我嚟講，除咗呢樣政策必然關乎我個人身份問題；另一方面，可能我視加拿大係我長遠嘅家，而且我堅信加拿大無論喺歷史定係未來發展上，移民政策都係非常非常重要嘅國策。

對於今次改革，我係樂見。但琴日睇完一堆資料同埋結合之前一路做嘅研究，我有問自己：對於今次改革，10分滿分我會俾幾多分？我諗我最多都係俾4-5分。

改革重點

今次改革係呼應4月嘅時候IRCC講嘅EE改革，喺其他分數項目不變嘅情況下，加分俾從事某啲高薪職業，或者已經拎到呢啲職業offer嘅候選人。加分會分為三層，加得最多分係管理層或者醫療/法律專業職業，例如係高級經理、醫生、律師等；其次係另一啲高薪專業職業，例如係工程師、IT專業人員等；最後係其他高薪職業，例如係技術工人、社工、金融從業員等。

以往未改革之前，薪金係完全唔會計算喺候選人嘅EE分數入面。換句話講，無論你係高薪職業定低薪職業，喺EE入面都係一視同仁；一個律師同law clerk，或者一個醫生同護士，假設其他因素例如學歷（例如大家都有碩士水平）、英文水平等等係一樣，喺EE入面都係一樣分數。

我嘅睇法

薪金計分

首先，我係非常贊同喺EE入面加入薪金考慮。EE作為聯邦政府經濟類移民嘅主要途徑，咁叫得做「經濟類」，就應該考慮候選人嘅經濟貢獻能力。呢個做法並唔係咩新鮮嘢，喺BC省提名同埋最近大改嘅安省提名，都加入咗以候選人薪金作為計分項目或者考慮因素。所以過往EE唔計算在內，反而我覺得都幾匪夷所思。

除此之外，我覺得今次改革最重要嘅另一個位係，可以改善到邀請「過份集中某啲工種」問題（而且呢啲工種未必係大家想像中咁符合EE所講「skilled labour」嘅工種）。等我哋睇吓過去十年，頭十項最多邀請嘅工種係咩：

第一位竟然係6311 - Food service supervisors！總數係26,115個邀請。除咗中間一啲IT職位外，第五同第六位分別係1241 - Administrative assistants同埋6211 - Retail sales supervisors。喺頭十位工種嘅邀請總數入面，呢三個職業就佔咗37%¹。

點解特別點名呢三個職業，唔係我單方面對呢啲職業嘅睇法²，而係第一，到底呢個國家係咪真係需要移民去從事呢啲職業？呢三個職業，係加拿大政府入面嘅分類，係唔需要大學或者以上學歷就可以從事，同我心目中「技術移民」嘅諗法幾有差距。再者，唔單止係我本人有呢啲疑問，而係有省政府都以行動表態：BC省政府喺今年開始，將唔再接受包括上述呢三種職業嘅省提名申請³。

而今次改革加入咗呢個考慮，成個格局將會改變：high-wage嘅工種候選人將會更加有優勢，變相其實係大大減少咗邀請從事上述職業嘅候選人。

點解我話10分滿分我只會俾4-5分

我絕對認同成個制度係需要改變，而且要係大改嗰種。The whole system is broken. 我唔覺得現有制度係有效咁吸納同留得低skilled immigrants。

但呢次「改革」，只係一個小改動，並冇觸及到一啲核心問題：成個制度依然過於籠統。

我認同加入薪金考慮，同時認同高薪職業同對國家帶嚟經濟貢獻係正相關，但唔同意一籃子為所有高薪職業加分⁴。今次改革只會考慮候選人嘅職業喺全國嘅薪金中位數，並唔考慮個人收入；政府話呢個做法係避免候選人因為地區差異而被不公平對待。呢個point我同意，但我覺得其實一個更加好，而且合理並可行嘅做法，係按照候選人所在地區（Census metropolitan area/地區/省份）嘅薪金中位數去計算。咁樣做，可以避免地區差異問題之餘，仲可以確切評估計算候選人係咪真係高於佢所在地區嘅薪金中位數。有啲地區，某一啲行業可能人工較高（or vice versa），咁樣做可以更公平，更加可以反映候選人嘅個人經濟貢獻能力。

另外，其實4月嘅時候，喺IRCC推出嘅諮詢文件入面，提到更加多方向嘅改革，例如：

1. 取消或減少申請人有兄弟姐妹喺PR/citizen加分；
2. 取消加拿大專上文憑為加分項目（保留學士以上學歷加分）；
3. 取消因為配偶喺加拿大而減分，

等等。喺早兩日嘅最終報告入面，雖然唔係每一項建議所有受訪者都有一致共識，但唯獨有一樣，就係第一項兄弟姐妹加分，大部分受訪者都認為應該取消。我覺得呢個加分根本由頭到尾都唔合理，完全唔明有兄弟姐妹喺加拿大同候選人嘅經濟貢獻能力有咩關係。

呢個加分項目甚至可以話係十分不公義：只要你有兄弟姐妹喺加拿大，就可以有15分；對比之下，由一年加拿大工作經驗變做兩年，最多都係得13分⁵。喺現時EE制度咁激烈嘅競爭下，呢15分絕對係舉足輕重。順帶一提，喺2024年，有14%嘅獲邀者係拎到呢15分⁶。成件事我最唔明白嘅係，既然大部分受訪者都認為呢個項目要取消，點解IRCC唔係喺今次改革入面一齊取消呢？最後都係返返去小修小補嘅問題。

改啲唔改啲，冇觸及到核心問題，呢個係我對今次改動嘅最大不滿。

結語（唔關EE改革事）

自從上年俾人ban咗Threads account之後，我都好耐冇咁長篇大論咁寫過同加拿大移民制度相關嘅嘢。

諗翻轉頭，由始至終我嘅初心都係想俾多啲分析角度俾香港人社群，喺呢個咁艱難嘅大環境下，希望大家可以知道多啲出路。You never know how much you can influence others. 所以當我知道上年寫咗啲同EE相關嘅嘢，而真係鼓勵到一啲人去申請，其實我係開心。

點解而家唔再喺Threads度寫，係因為我漸漸發現，好多時我係想討論個政策本身，多於討論個人情況。可能大家會比較關心今次改動對自己有冇得益，多於個制度有冇變得更加公平，更針對本身嘅政策初衷，更服務呢個國家嘅未來。呢樣嘢未必喺Threads做到。

我都明好多人都面對好困難嘅情況，因為好多不確定性，心理上面對住好大壓力，冇咩餘裕同精力去討論政策本身。但正如我開頭所講，可能我視加拿大係未來嘅家，而移民政策的確係影響住呢個國家嘅未來，所以我想盡力去抽離個人情況，去討論政策本身。

我相信如果大家都真係視加拿大係長遠嘅家，將來會入籍去投票，參與呢度嘅社會事務，我哋真係要關心多啲，分析多啲，呢個國家唔同嘅政策。