移民政策與內心平靜

原來呢個星期都幾多嘢發生（仲有上幾星期連續嚟嘅亞省公投、BC省市選同大選，以及安省（incl. 多倫多）市選）。嚟緊會有：

1. 我自己上緊個GIS（Geographic Information System）堂要交功課同做quiz之外
2. 加拿大EE 喺聽日（11月3號）引入高薪職業加分
3. 英國移民政策改革（今日）
4. 美國中期選舉（11月3號）
5. 加拿大準備發布新嘅移民政策同財政預算案（11月5號）

今日見到英國移民政策改革，雖然唔關我自己事，但一嚟搵加拿大移民政策嘅資料嘅時候少不免會睇埋英國嘅制度，二嚟自己都幾多朋友喺嗰邊，有咩風吹草動都影響到佢哋。

雖然我唔熟英國嘅制度，但見到非高薪類技術移民由五年變成十年，都幾誇張，好難想像要為咗一個身份留喺嗰度十年，仲要中間俾人炒咗就898玩完（雖然我唔知其實英國係咪冇加拿大/美國咁容易俾人炒）。所幸嘅係香港人嘅BNO Visa大致上（除咗英文唔知會唔會由B1變成B2）冇咩大改動，都係維持5+1。

一路去睇唔同嘅移民政策，加拿大、英國、美國、澳洲也好，移民政策一有改動，總係有人歡喜有人愁。

我自己覺得移民政策本身係好特別嘅一項政策，尤其係移民國家入面：

1. 最關心嘅人通常係臨時居民，但佢哋冇票冇say；本地出世嘅人通常都唔係咁關心¹；最後，本身有關心開而有投票嘅人（i.e. 成功移民嘅人）通常都唔會再理。好多時最想有noise同最影響到佢哋利益嘅人，係最無牙力嘅一群人。
2. 另一個特點，我覺得移民政策，對於移民個人本身，唔存在絕對嘅公平、平等，或者所謂正義。歸根究底，移民政策最後都係用嚟服務嗰個國家同埋佢哋嘅公民：當國家有需要嘅時候，規則自然要改（不論改動是否人道或合理）。可能我諗得真係好零和，但規則一變，好似一場比賽咁，必然係有人係贏家，有人係輸家。好多時「上岸」與否，不全然係靠自己努唔努力，更加多係講時機同運數。其中一樣我哋可以做嘅，尤其如果自己係「贏家」，就係唔好對其他人嘅苦況落井下石。

喺呢段時間，全球保護主義抬頭，局勢比起以往更動盪嘅情況下，移民作為其中一批最脆弱嘅人，好多時都係最容易被犧牲，例如係承受住種種政策嘅不確定性。好多時計劃好嘅嘢，最後都唔到自己控制。對我自己而言，作為一個外勞（aka所謂未上岸嘅人），同樣地每日面對住呢啲不確定性。

好想好想同大家以及自己強調，呢種追求係一個過程，過程中總有高低起伏。

呢段時間幸運地我公司資助咗我去上GIS堂，學點整地圖、睇衛星圖同坐標等等；喺學習新知識同埋做功課嘅過程中，某些片刻我真係覺得自己好lock in，進入到嗰種「心流」狀態。

好慶幸我搵到屬於自己嘅方法。希望大家都可以搵到，捱過呢段咁艱難嘅時期。